ਇਸ ਸਾਦਾ ਪਰ ਪ੍ਰਭਾਵਸ਼ਾਲੀ ਸਮਾਗਮ ਦੌਰਾਨ ਜਸਟਿਸ ਮੋਤਾ ਸਿੰਘ, ‘ਸਾਹਿਬ’ ਅਤੇ ‘ਸ਼ਬਦ ਯੱਗ’ ਦੇ ਮੁੱਖ ਸੰਪਾਦਕ ਰਣਜੀਤ ਸਿੰਘ ਰਾਣਾ, ਰਾਮਗੜ੍ਹੀਆ ਗੁਰਦੁਆਰਾ ਕਮੇਟੀ ਦੇ ਪ੍ਰਧਾਨ ਜਸਪਾਲ ਸਿੰਘ ਭੰਮਰਾ, ਉਸਤਾਦ ਸ਼ਾਇਰ ਚਮਨ ਲਾਲ ਚਮਨ, ਉੱਘੇ ਸਾਹਿਤਕਾਰ ਸਾਥੀ ਲੁਧਿਆਣਵੀ ਨੇ ਡਾ. ਤਾਰਾ ਸਿੰਘ ਆਲਮ ਦੀਆਂ ਲਿਖਤਾਂ ਸੰਬੰਧੀ ਚਾਨਣਾ ਪਾਉਂਦਿਆਂ ਲੇਖ- ਸੰਗ੍ਰਿਹ ਲੋਕ ਅਰਪਣ ਕਰਨ ਦੀ ਰਸਮ ਅਦਾ ਕੀਤੀ। ਹਾਜਰੀਨ ਨੂੰ ਸੰਬੋਧਨ ਕਰਦਿਆਂ ਜਸਟਿਸ ਮੋਤਾ ਸਿੰਘ ਨੇ ਕਿਹਾ ਕਿ ਦੁਨਿਆਵੀ ਭੀੜ- ਭੜੱਕੇ ਵਿੱਚ ਉਲਝੇ ਚਿੱਤ ਨੂੰ ਟਿਕਾਣੇ ਰੱਖਣ ਦੀਆਂ ਜੋ ਜੁਗਤਾਂ ਡਾ. ਆਲਮ ਨੇ ਇੱਕ ਪੁਸਤਕ ਦੇ ਰੂਪ ਵਿੱਚ ਪਾਠਕ ਜਗਤ ਦੀ ਝੋਲੀ ਪਾਈਆਂ ਹਨ, ਕਾਬਲੇ ਤਾਰੀਫ ਅਤੇ ਸਿਜ਼ਦਾ ਕਰਨ ਲਾਇਕ ਹਨ। ਇਸ ਸਮੇਂ ਬੋਲਦਿਆਂ ਰਣਜੀਤ ਸਿੰਘ ਰਾਣਾ ਨੇ ਕਿਹਾ ਕਿ ਡਾ. ਤਾਰਾ ਸਿੰਘ ਆਲਮ ਨੇ ਸੇਵਾ ਅਤੇ ਸਿਮਰਨ ਦੇ ਨਿੱਜੀ ਅਨੁਭਵ ਨੂੰ ਗੁਰਮਤਿ ਫਲਸਫ਼ੇ ਦੀ ਕਸੌਟੀ ਨਾਲ ਪਰਖ ਕੇ ਰੂਹਾਨੀਅਤ ਦਾ ਜਿਹੜਾ ਨਕਸ਼ਾ ਇਸ ਹਥਲੀ ਪੁਸਤਕ ਰਾਹੀਂ ਪ੍ਰਸਤੁਤ ਕੀਤਾ ਹੈ, ਉਹ ਮਨੁੱਖੀ ਮਨ ਨੂੰ ਟਿਕਾਣੇ ਰੱਖਣ ਵਾਲਾ ਹੈ। ਉੱਘੇ ਸਾਹਿਤਕਾਰ ਸਾਥੀ ਲੁਧਿਆਣਵੀ ਨੇ ਕਿਹਾ ਕਿ ਡਾ. ਆਲਮ ਦੀ ਇਸ ਕਿਰਤ ਨੂੰ ਸਾਹਿਤ ਜਗਤ ਵਿੱਚ ਇੱਕ ਅਨਮੋਲ ਕਿਰਤ ਵਜੋਂ ਹਮੇਸ਼ਾ ਮਾਣ ਮਿਲਦਾ ਰਹੇਗਾ। ਉਹਨਾਂ ਉਕਤ ਪੁਸਤਕ ਨੂੰ ਸਫ਼ਲ ਜੀਵਨ ਜਿਉਣ ਦੇ ਰਾਹ ਵੱਲ ਲੱਗੇ ਜਿੰਦਰੇ ਦੀ ਚਾਬੀ ਦੱਸਦਿਆਂ ਡਾ. ਆਲਮ ਨੂੰ ਵਧਾਈ ਦਿੱਤੀ।

ਸਮਾਗਮ ਦੌਰਾਨ ਨੌਜਵਾਨ ਗਾਇਕ ਵੀਰਮਨਪ੍ਰੀਤ ਸਿੰਘ ਨੇ ਡਾ. ਆਲਮ ਦੇ ਰਚੇ ਅਗਾਂਹਵਧੂ ਗੀਤ “ਮੈਂ ਇੱਕ ਗੀਤ ਮੁਖ਼ਾਤਿਬ ਕਰਦਾ ਹਾਂ, ਹਿੰਦ- ਪਾਕਿ ਦੀਆਂ ਸਰਕਾਰਾਂ ਨੂੰ” ਗਾ ਕੇ ਸਮਾਗਮ ਨੂੰ ਸਿਖਰਾਂ ਵੱਲ ਪਹੁੰਚਾਇਆ। ਇਸ ਸਮੇਂ ਜਸਵੀਰ ਸਿੰਘ ਮਠਾੜੂ, ਸ਼ਾਇਰਾ ਕੁਲਵੰਤ ਕੌਰ ਢਿੱਲੋਂ, ਜਗਸੀਰ ਧਾਲੀਵਾਲ ਨੰਗਲ, ਉੱਘੇ ਰੰਗਕਰਮੀ ਸ਼ੇਖਰ, ਭਾਈ ਰਾਮ ਸਿੰਘ, ਪੰਜਾਬੀ ਸਾਹਿਤ ਕਲਾ ਕੇਂਦਰ ਸਾਊਥਾਲ ਦੇ ਸਕੱਤਰ ਅਜ਼ੀਮ ਸ਼ੇਖਰ, ਸ੍ਰੀਮਤੀ ਪੂਨਮ ਦੇਵੀ ਵਿਸ਼ੇਸ਼ ਤੌਰ ‘ਤੇ ਹਾਜ਼ਰ ਸਨ।

ਮਨਦੀਪ ਖੁਰਮੀ ਹਿੰਮਤਪੁਰਾ (ਇੰਗਲੈਂਡ)