.ਖਤ
- ਸੁਰਜੀਤ ਸਿੰਘ ਭੁੱਲਰ

ਤੈਨੂੰ .ਖਤ,
ਤੇਰੇ ਕਹਿਣ ਤੇ ਹੀ ਲਿਖਿਆ ਸੀ,
ਤੇ ਤੂੰ ਹੱਥ ਤੇ ਹੱਥ ਰੱਖ ਕੇ ਕਿਹਾ ਸੀ,
ਮੇਰਾ ਭੇਜਿਆ ਹਰ ਸ਼ਬਦ,
ਮਨ ਦੇ ਭਾਵਾਂ ਦਾ,
ਸਹੀ ਪ੍ਰਤੀਕ ਹੋਵੇਗਾ ।
 

ਤੇਰੇ ਕਹਿਣ ਤੇ ਹੀ,
ਤੇਰੇ .ਖਤ ਦੀ ਉਡੀਕ ਕਰਦਾ ਹਾਂ ।
ਉਂਜ ਤੇ ਭਾਵੇ ਮੇਰੀ ਜ਼ਿੰਦਗੀ ਦੀ ਅਕਾਈ,
ਬਣੀ ਹੀ ਹਰ ਛਿਣ ਦੇ,
ਇੰਤਜ਼ਾਰ ਤੋਂ ਗੁੜਤੀ ਲੈ ਕੇ ਹੈ ।

ਅਜ ਫਿਰ, ਵੇਦਣਾ,
ਤੜਪ ਤੇ ਚੀਸ ਉੱਠੀ ਹੈ
ਦਿਲ ਸਮੁੰਦਰ ਦੇ ਉਛਾਲੇ ਚੌਂ,
ਜਵਾਰ-ਭਾਟੇ ਵਾਂਗ
ਮੇਰੇ ਹਰ ਪਾਸੇ,
ਚਿੱਬ-ਖੜਿੱਬੀਆਂ ਯਾਦਾਂ ਥਪੇੜੇ ਮਾਰਦੀਆਂ ਹਨ ।
ਪਰ ਮੈ ਫਿਰ ਵੀ,
ਇਹ ਸਬ ਜਰ ਗਿਆ ਹਾਂ ।
ਕੁਝ ਪਲਾਂ ਵਿਚ
ਇਹ ਸਭ ਸ਼ਾਂਤ ਹੋ ਜਾਵੇਗਾ,
ਜਦ ਪੋਸਟ-ਮੈਨ
ਬਿਨਾ ਰੁਕੇ,
ਮੇਰੇ ਕੋਲੌਂ ਦੀ ਲੰਘ ਜਾਵੇਗਾ ।