ਲੰਡਨ - ਪਿਛਲੇ ਦਿਨੀ ਪੰਜਾਬੀ ਸਾਹਿਤ ਕਲਾ ਕੇਂਦਰ, ਯੂ ਕੇ ਦਾ ਸਾਲਾਨਾ ਸਾਹਿਤਕ ਸਮਾਗ਼ਮ ਨਿਹਾਇਤ ਕਾਮਯਾਬੀ ਨਾਲ ‘ਦੀ ਸੈਟਰ’ ਸਾਊਥਾਲ ਵਿਖ਼ੇ ਸਿਰੇ ਚੜ੍ਹਿਆ। ਪਹਿਲੇ ਸੈਸ਼ਨ ਵਿਚ ਡਾ. ਸਾਥੀ ਲੁਧਿਆਣਵੀ ਦੀ ਪੁਸਤਕ ‘ਨਿੱਘੇ ਮਿੱਤਰ ਮੁਲਾਕਾਤਾਂ’ ਉਤੇ ਡਾਕਟਰ ਬਲਦੇਵ ਸਿੰਘ ਕੰਦੋਲਾ ਨੇ ਪੇਪਰ ਪੜ੍ਹਿਆ। ਜਿਸ ਉਤੇ ਭਰਪੂਰ ਬਹਿਸ ਹੋਈ। ਬੁਲਾਰਿਆਂ ਨੇ ਸਾਥੀ ਲੁਧਿਆਣਵੀ ਦੀ ਵਾਰਤਕ ਤੇ ਸ਼ੈਲੀ ਦੀ ਪ੍ਰਸੰਸਾ ਕੀਤੀ ਤੇ ਇਸ ਦੇ ਨਾਲ ਨਾਲ ਇਸ ਪੁਸਤਕ ਵਿਚ ਮੁਲਾਕਾਤੀਆਂ ਨੂੰ ਪੁੱਛੇ ਗਏ ਸਵਾਲਾਂ ਦੀ ਸਹਿਜਤਾ ਅਤੇ ਸਟਾਈਲ ਦਾ ਵੀ ਇਹਤਰਾਮ ਕੀਤਾ। ਇਹ ਵੀ ਕਿਹਾ ਕਿ ਇਹ ਪੁਸਤਕ ਇਕ ਕੀਮਤੀ ਸਾਹਿਤਕ ਅਤੇ ਕਲਚਰਲ ਦਸਤਾਵੇਜ਼ ਹੈ ਤੇ ਕਿਹਾ ਕਿ ਇਸ ਨੂੰ ਯੁਨਵਿਰਸਿਟੀਆਂ, ਲਾਇਬਰੇਰੀਆਂ ਅਤੇ ਹੋਰ ਵਿਦਿਅਕ ਅਦਾਰਿਆਂ ਨੂੰ ਯੋਗ ਥਾਂ ਦੇਣੀ ਚਾਹੀਦੀ ਹੈ।

ਇਸ ਪੁਸਤਕ ਰਾਹੀਂ ਸੰਬੰਧਤ ਲੇਖ਼ਕਾਂ ਦੀਆਂ ਚੰਗੀਆਂ ਅਤੇ ਮੰਦੀਆਂ ਪ੍ਰਾਪਤੀਆਂ ਅਤੇ ਤਰੁਟੀਆਂ ਵਾਰੇ ਵੀ ਪਤਾ ਚਲਦਾ ਹੈ। ਬਹਿਸ ਅਧੀਨ ਏਨਾ ਵਧੀਆ ਅਤੇ ਸਾਦੀ ਭਾਸ਼ਾ ਵਾਲਾ ਪਰਚਾ ਲਿਖ਼ਣ ਲਈ ਡਾਕਟਰ ਬਲਦੇਵ ਸਿੰਘ ਕੰਦੋਲਾ ਦੀ ਵੀ ਤਾਰੀਫ਼ ਕੀਤੀ ਗਈ। ਇਸ ਸੈਸ਼ਨ ਦੀ ਪ੍ਰਧਾਨਗੀ ਕਾਮਰੇਡ ਅਵਤਾਰ ਉੱਪਲ, ਮਨਮੋਹਨ ਸਿੰਘ, ਨਾਵਲਕਾਰ ਮੋਹਿੰਦਰਪਾਲ ਧਾਲੀਵਾਲ, ਭਾਰਤ ਤੋਂ ਆਈ ਕਵਿੱਤਰੀ ਨਵਰੂਪ ਕੌਰ, ਫਿਲਮ ‘ਔਨਰ ਕਿਲਿੰਗ’ ਦੇ ਡਾਇਰੈਕਟਰ ਅਵਤਾਰ ਭੋਗਲ, ਵੀਰੇਂਦਰ ਸ਼ਰਮਾ ਮੈਂਬਰ ਪਾਰਲੀਮੈਂਟ ਅਤੇ ਮੇਅਰ ਔਫ਼ ਈਲਿੰਗ ਕੌਂਸਲਰ ਹਰਭਜਨ ਕੌਰ ਧੀਰ ਨੇ ਕੀਤੀ।

ਦੂਜਾ ਪਰਚਾ ਗੁਰਨਾਮ ਗਰੇਵਾਲ ਵਲੋਂ ‘ਵਾਤਾਵਰਣ ਅਤੇ ਪ੍ਰਦੂਸ਼ਣ’ ਨਾਂ ਦਾ ਪੇਪਰ ਪੜ੍ਹਿਆ ਗਿਆ। ਪ੍ਰਦੂਸ਼ਣ ਦੀ ਗੰਭੀਰਤਾ ਨੂੰ ਇਸ ਪੇਪਰ ਵਿਚ ਸਿਰਫ਼ ਭਾਰਤ ਨਾਲ ਹੀ ਨਹੀਂ ਸਗੋਂ ਸਮੁੱਚੇ ਬ੍ਰਹਿਮੰਡ ਅਤੇ ਕਾਇਨਾਤ ਨਾਲ ਜੋੜਿਆ ਗਿਆ। ਸਾਰੇ ਬੁਲਾਰਿਆਂ ਨੇ ਕਿਹਾ ਕਿ ਇਹ ਇਕ ਐਹੋ ਜਿਹਾ ਸੰਜੀਦਾ ਵਿਸ਼ਾ ਹੈ ਜਿਸ ਵੱਲ ਸਾਰੇ ਪੰਜਾਬੀ ਲੇਖ਼ਕਾਂ ਨੂੰ ਹੋਰ ਧਿਆਨ ਦੇਣਾ ਚਾਹੀਦਾ ਹੈ। ਬਹਿਸ ਵਿਚ ਹਿੱਸਾ ਲੈਣ ਵਾਲਿਆਂ ਵਿਚ ਸਰਬਸ੍ਰੀ ਕਿਰਪਾਲ ਪੂਨੀ, ਪ੍ਰਕਾਸ਼ ਸੋਹਲ, ਮਨਮੋਹਨ ਸਿੰਘ, ਕੌਂਸਲਰ ਹਰਭਜਨ ਕੌਰ ਧੀਰ, ਵੀਰੇਂਦਰ ਸ਼ਰਮਾ ਐਮ ਪੀ, ਜਗਜੀਤ ਕੌਰ ਕੋਹਲੀ, ਮੋਹਿੰਦਰਪਾਲ ਸਿੰਘ ਧਾਲੀਵਾਲ ਆਦਿ ਨੇ ਹਿੱਸਾ ਲਿਆ। ਇਸ ਸੈਸ਼ਨ ਨੂੰ ਕੁਲਵੰਤ ਕੌਰ ਢਿੱਲੋਂ ਨੇ ਕੰਡਕਟ ਕੀਤਾ। ਉਪਰੰਤ ਡਾਕਟਰ ਸਾਥੀ ਲੁਧਿਆਣਵੀ ਦੀ ਪੁਸਤਕ ‘ਨਿੱਘੇ ਮਿੱਤਰ ਮੁਲਾਕਾਤਾਂ’ ਮੇਅਰ ਔਫ ਈਲਿੰਗ ਅਤੇ ਮੈਂਬਰ ਪਾਰਲੀਮੈਂਟ ਵੀਰਿੰਦਰਾ ਸ਼ਰਮਾ ਨੇ ਰੀਲੀਜ਼ ਕੀਤੀ।

ਬਰੇਕ ਤੋਂ ਬਾਅਦ ਦੇ ਕਵੀ ਦਰਬਾਰ ਦੇ ਸੈਸ਼ਨ ਦੇ ਅਰੰਭ ਵਿਚ ਲੇਖ਼ਕ ਪ੍ਰਮਿੰਦਰਜੀਤ ਅਤੇ ਨੇਪਾਲ ਵਿਚ ਭੂਕੰਪ ਨਾਲ ਮਾਰੇ ਗਏ ਲੋਕਾਂ ਦੀ ਯਾਦ ਵਿਚ ਦੋ ਮਿੰਟ ਦਾ ਮੋਨ ਵਰਤ ਰੱਖਿਆ ਗਿਆ। ਇਸ ਸੈਸ਼ਨ ਦੀ ਪ੍ਰਧਾਨਗੀ ਸਭਾ ਦੇ ਪ੍ਰਧਾਨ ਡਾਕਟਰ ਸਾਥੀ ਲੁਧਿਆਣਵੀ, ਸੰਤੋਖ਼ ਸਿੰਘ ਸੰਤੋਖ਼, ਚਮਨ ਲਾਲ ਚਮਨ, ਵੀਰੇਂਦਰ ਪਰਿਹਾਰ ਅਤੇ ਸੰਤੋਖ਼ ਸਿੰਘ ਹੇਅਰ ਨੇ ਕੀਤੀ। ਇਸ ਵੱਖਰੇ ਤੇ ਨਿਵੇਕਲੇ ਕਵੀ ਦਰਬਾਰ ਵਿਚ ਮਨਜੀਤ ਕੌਰ ਪੱਡਾ, ਕੁਲਵੰਤ ਕੌਰ ਢਿੱਲੋਂ, ਗੁਰਨਾਮ ਗਰੇਵਾਲ, ਮਨਪ੍ਰੀਤ ਬੱਧਨੀਕਲਾਂ, ਰਘਬੀਰ ਰਾਹੀ ਬੈਂਸ, ਜਸਵੰਤ ਕੌਰ ਬੋਲਾ, ਵੀਰੇਂਦਰ ਪਰਿਹਾਰ, ਦਰਸ਼ਨ ਬੁਲੰਦਵੀ, ਪ੍ਰਕਾਸ਼ ਸਿੰਘ ਸੋਹਲ, ਸਤਨਾਮ ਕੌਰ, ਮਨਪ੍ਰੀਤ ਕੌਰ, ਕੁਲਦੀਪ ਬਾਂਸਲ, ਮਹਿੰਦਰ ਕੌਰ ਪੱਡਾ, ਡਾ.ਕਿਰਨਦੀਪ ਕੌਰ, ਗੁਰਬਚਨ ਆਜ਼ਾਦ, ਸਿਕੰਦਰ ਬਰਾੜ, ਸਾਥੀ ਲੁਧਿਆਣਵੀ, ਕਿਰਪਾਲ ਪੂਨੀ, ਸੰਤੋਖ਼ ਸਿੰਘ ਹੇਅਰ, ਡਾ.ਜਗੀਰ ਕੌਰ ਸੇਖੋਂ, ਪੰਮਾ ਲਸਾੜੀਆ, ਅਜ਼ੀਮ ਸ਼ੇਖ਼ਰ, ਨਵਰੂਪ ਕੌਰ, ਦਲਬੀਰ ਪੱਤੜ, ਰਾਜਿੰਦਰਜੀਤ ਅਤੇ ਰੂਪ ਦੇਵਿੰਦਰ ਕੌਰ ਨੇ ਭਾਗ ਲਿਆ। ਅਜ਼ੀਮ ਸ਼ੇਖਰ ਨੇ ਇਸ ਸੈਸ਼ਨ ਦੀ ਸਟੇਜ ਸਕੱਤਰੀ ਕੀਤੀ। ਅੰਤ ਵਿਚ ਡਾਕਟਰ ਸਾਥੀ ਲੁਧਿਆਣਵੀ ਨੇ ਆਏ ਮਹਿਮਾਨਾਂ ਦਾ ਧੰਨਬਾਦ ਕੀਤਾ। ਕੁਲ ਬਰਤਾਨੀਆਂ ਤੋਂ ਆਏ ਮਹਿਮਾਨਾ ਨੇ ਪ੍ਰੀਤੀ ਭੋਜਨ ਛਕ ਕੇ ਵਿਦਾਈ ਲਈ।

ਰੀਪੋਰਟ:- ਅਜ਼ੀਮ ਸ਼ੇਖ਼ਰ ਸਕੱਤਰ ਪੰਜਾਬੀ ਸਾਹਿਤ ਕਲਾ ਕੇਂਦਰ, ਯੂ ਕੇ।