" ਇੱਕ ਸੀ ਬਿੱਲੀ। ਉਹਦੇ ਦੋ ਬਲੂੰਗੜੇ ਹੋਏ। ਉੱਤੋਂ ਠੰਡ ਬੜੀ। ਬਿੱਲੀ ਤੇ ਉਹਦੇ ਬਲੂੰਗੜਿਆਂ ਵਿਚਾਰਿਆਂ ਰਹਿਣ ਨੂੰ ਘਰ ਕੋਈ ਨਾਂ।"

"ਫੇਰ ਬਾਪੂ ਜੀ ! "

ਫੇਰ ਕੀ! ਇੱਕ ਦਿਨ ਉਹ ਰਾਹ ਦੇ ਵਿਚਾਲੇ ਜਾ ਬੈਠੀ। ਇੱਕ ਗੁੜ ਦਾ ਲੱਦਿਆ ਗੱਡਾ ਆਉਂਦਾ ਸੀ। ਗੱਡੇ ਵਾਲਾ ਭਾਈ ਕਹਿੰਦਾ, " ਬਿੱਲੀਏ ਬਿੱਲੀਏ! ਪਾਸੇ ਹੱਟ ਜਾ, ਮਰ ਜਾਏਂਗੀ, ਤੂੰ ਤਾਂ ਮਰੇਂਗੀ! ਨਾਲ ਐਵੇਂ ਮੈਨੂੰ ਪਾਪ ਚੜਾਏਂਗੀ।"

ਅੱਗੋ ਬਿੱਲੀ ਕਹਿੰਦੀ, ਪਹਿਲਾਂ ਤੂੰ ਇੱਕ ਗੱਟਾ ਗੁੜ ਦਾ ਇੱਥੇ ਲਾਹ! ਫੇਰ ਮੈਂ ਪਾਸੇ ਹੱਟ ਜਾਊਂਗੀ! ਗੱਡੇ ਵਾਲੇ ਨੂੰ ਮਜਬੂਰੀ ਵੱਸ ਇੱਕ ਗੱਟਾ ਗੁੜ ਦਾ ਲਾਉਣਾ ਪਿਆ ਅਤੇ ਬਿੱਲੀ ਨੇ ਰਸਤਾ ਛੱਡ ਦਿੱਤਾ! ਗੱਡੇ ਵਾਲਾ ਚਲਦਾ ਬਣਿਆਂ।

ਥੋੜੇ ਚਿਰ ਪਿੱਛੋਂ ਇੱਕ ਚੌਲਾਂ ਵਾਲਾ ਗੱਡਾ ਆਉਂਦਾ ਸੀ, ਬਿੱਲੀ ਫੇਰ ਰਾਹ ਵਿੱਚ ਬੈਠ ਗਈ। ਗੱਡੇ ਵਾਲਾ ਭਾਈ ਕਹਿੰਦਾ, " ਬਿੱਲੀਏ ਬਿੱਲੀਏ, ਰਾਹ ਛੱਡਦੇ ਗੱਡੇ ਥੱਲੇ ਆਕੇ ਮਰਜੇਂਗੀ" ਬਿੱਲੀ ਕਹਿੰਦੀ, ਪਹਿਲਾਂ ਇੱਕ ਬੋਰੀ ਚੌਲਾਂ ਦੀ ਇੱਥੇ ਰੱਖ, ਫਿਰ ਮੈਂ ਤੈਨੂੰ ਰਾਹ ਛੱਡ ਦੇਊਂਗੀ। ਗੱਡੇ ਵਾਲੇ ਭਾਈ ਨੇ ਚੌਲਾਂ ਦੀ ਇੱਕ ਬੋਰੀ ਬਿੱਲੀ ਕੋਲੇ ਲਾਹ ਦਿੱਤੀ। ਹੁਣ, ਬਿੱਲੀ ਨੇ ਗੁੜ ਦੀਆਂ ਬਣਾਈਆਂ ਇੱਟਾਂ ਤੇ ਚੌਲਾਂ ਦਾ ਬਣਾਇਆ ਗਾਰਾ! ਸੋਹਣਾ ਜਿਆ ਵਧੀਆ ਜਿਆ ਘਰ ਪਾ ਲਿਆ!

" ਫੇਰ ਬਾਪੂ! "

ਫੇਰ ਕੀ! ਹੁਣ ਆਰਾਮ ਨਾਲ ਆਵਦੇ ਘਰੇ ਰਹਿੰਦੇ ਆ! ਰੋਟੀ ਪਾਣੀ ਖਾਂਦੇ ਆ, ਟੈਮ ਨਾਲ! " ਤੇ ਬਾਪੂ ਨੇ ਕਹਾਣੀ ਖਤਮ ਕਰ ਦੇਣੀ।

ਮੇਰੇ ਛੋਟੇ ਦਾਦਾ ਜੀ ਦਾ ਨਾਂ ਸਰਬਨ ਸਿੰਘ ਸੀ। ਉਹ ਪਿੰਡ ਦੇ ਨੰਬਰਦਾਰ ਵੀ ਰਹੇ। ਉਹਨਾਂ ਦੀ ਇਹ ਬਿੱਲੀ ਵਾਲੀ ਕਹਾਣੀ ਮੈਂ ਸੌ ਨਹੀਂ ਸਗੋਂ ਹਜਾਰਾਂ ਵਾਰ ਸੁਣੀ ਪਰ ਜਦੋਂ ਵੀ ਬਾਪੂ ਜੀ ਅੱਗੇ ਕਹਾਣੀ ਸੁਣਨ ਦੀ ਜਿਦ ਕਰਨੀ, ਉਹਨਾਂ ਨੇ ਇਹ ਕਹਾਣੀ ਮੈਨੂੰ ਸੁਣਾ ਦੇਣੀ। ਭਾਵੇਂ ਇਹ ਬਾਪੂ ਨੂੰ ਨੇ ਮੈਨੂੰ ਕਿੰਨੇ ਵਾਰ ਵੀ ਸੁਣਾਈ ਹੋਵੇ ਪਰ ਜਦੋਂ ਵੀ ਬਾਪੂ ਨੇ ਸੁਣਾਉਣ ਲੱਗਣਾ ਮੈਂ ਚੁੱਪ ਚਾਪ ਸੁਣਨ ਬੈਠ ਜਾਣਾ। ਬੜਾ ਚਾਅ ਚੜਨਾ, ਇੰਨਾ ਕਿ ਸਬਦਾਂ ਵਿੱਚ ਬਿਆਨ ਕਰਨਾ ਮੁਸਕਿਲ ਹੈ। ਅੱਜ ਬਾਪੂ ਸਰਬਨ ਸਿਉਂ ਨੂੰ ਗੁਜਰੇ ਭਾਵੇਂ ਗਿਆਰਾਂ ਸਾਲ ਹੋ ਚੁੱਕੇ ਹਨ ਪਰ ਅੱਜ ਵੀ ਜਦ ਮੈਂ ਘਰ ਛੁੱਟੀ ਜਾਂਦਾ ਹਾਂ ਤਾਂ ਬਾਪੂ ਬਹੁਤ ਚੇਤੇ ਆਉਂਦੈ। ਬਹੁਤ ਜੀਅ ਕਰਦਾ ਕੋਈ ਬਾਤਾਂ ਪਾਵੇ, ਕਹਾਣੀਆਂ ਸੁਣਾਵੇ, ਬੀਤੇ ਵੇਲੇ ਦੀਆਂ ਗੱਲਾਂ ਮੇਰੇ ਨਾਲ ਸਾਂਝੀਆਂ ਕਰੇ। ਬਾਪੂ ਸਰਬਨ ਸਿਉਂ ਸਾਡਾ ਸਾਰਾ ਈ ਪਿੰਡ ਯਾਦ ਕਰਦੈ। ਥੜਿਆਂ ਦੀ ਰੌਣਕ ਸੀ ਉਹ।

ਬਾਪੂ ਨੇ 1947 ਵਾਲੀ ਵੰਡ ਵਿੱਚ ਇੱਕ ਗਰੀਬ ਮੁਸਲਮਾਨ ਨੂੰ ਵੀ ਮਾਰਨ ਤੋਂ ਬਚਾਇਆ, ਉਹ ਮੁਸਲਮਾਨ ਅੱਜ ਵੀ ਸਾਡੇ ਪਿੰਡ ਵਿੱਚ ਹੈ, ਜੀਅਦਾ ਨਾਂ ਬੱਗਾ ਖਾਨ ਹੈ, ਜਿਹੜਾ ਸਾਡੇ ਪਰਿਵਾਰ ਦਾ ਧੰਨਵਾਦ ਕਰਦਾ ਨੀ ਥੱਕਦਾ। ਕਈ ਵਾਰ ਬਾਪੂ ਨੇ ਦੱਸਣਾ ਕਿ ਕਿਵੇਂ ਉਹ ਸਵੇਰੇ ਢਾਈ ਤਿੰਨ ਵਜੇ ਹਲ ਜੋੜ ਲੈਂਦੇ ਸੀ। ਸਾਰਾ ਦਿਨ ਬਲਦਾਂ ਪਿੱਛੇ ਤੁਰੇ ਫਿਰਨਾ। ਬਲਦਾਂ ਦਾ ਆਵਦੇ ਪੁੱਤਾਂ ਤੋਂ ਵੀ ਵੱਧ ਖਿਆਲ ਰੱਖਣਾ। ਹੋਰ ਵੀ ਬੜੀਆਂ ਗੱਲਾਂ ਬਾਪੂ ਦੀਆਂ, ਜਿਹੜੀਆਂ ਸਮੇਂ ਦੇ ਤਾਨੇ ਬਾਨੇ ਵਿੱਚ ਉਲਝ ਗਈਆਂ। ਜਿਨਾਂ ਨੂੰ ਯਾਦ ਕਰ ਕਰ ਕੇ ਦਿਲ ਰੋ ਪੈਂਦਾ ।

ਗੁਰਪ੍ਰੀਤ ਸਿੰਘ ਫੂਲੇਵਾਲਾ , ਮੋਗਾ ।
9914081524